Má ekki skoða þessi verð aðeins betur

farið bara inn á www.matas.dk  undir håndköpsmedicin og lokalt smertestillende, þá kemur verðið 62,95 dkk sem gerir ca:750.- ísl.  Og Nicorette Freshmint 105 stk 2mg er á rétt tæpar 1800.- ísl. ég held að verðið á Nicorette sé svipað hér. Eins má það koma fram hér að Matas er ekki apótek, þó það séu selt eitthvað af lausasölulyfjum þar í læstum skápum. Þar er ekki faglært starfsfólk eins og er í venjulegum dönskum apótekum. Það er frjáls álagning á lausasölulyfjum hér á Íslandi þannig að það hlýtur að vera sama staða á þessu eins og annarri vöru hér. Stundum fáránlega dýrari en stundum ekki. Svo eru apótekin misdýr. Sjálfsagt hægt að fá þetta ódýrara hér.

70% verðmunur á lyfi í Danmörku og Íslandi

Reykjavík, sl. helgi

Þetta var ansi stór helgi í Reykjavík. Ótrúlega flott helgi. Ég var mætt á laugardagsmorgun kl:9 í miðbæ Reykjavíkur og var að vinna við Maraþonið. Þetta var mikil upplifun og í fyrsta skipti sem ég er viðstödd hlaupið. Mikið rosalega var gaman og ég mundi segja að veðrið hafi spilað þar stóran sess. Þvílíkt veður sem við fengum. Mikið til af ofsalega duglegu fólki og það kom mér á óvart að sjá hvað börnin voru, bæði mörg og dugleg í 3ja og 10 kílómetra hlaupinu. En svo var ekki minni viðburður að sjá allt fólkið sem tók þátt í Latabæjarhlaupinu yfir 4000 krakkar skráðir til hlaups og með yngstu hópunum voru foreldrar eða eldri systkyn með. Ótrúlega flottir krakkar þarna og alveg ofsalega dugleg. Þetta var mjög skemmtilegur dagur og ekkert þrek eftir ef vilji hefði verið til að fara að sjá aðra viðburði þennan dag. Ég var sæl og mjög þreytt eftir daginn en hljóp þó ekki. En mig langar, það er auðvelt að smitast af þessari miklu sigurgleði sem fólk var í eftir að hafa komið í mark og margir að sigra sjálfan sig. Ég þarf að taka mig á, yngra barnið ætlar að hlaupa 3 kílómetra að ári og ekki sendi ég hana eina. Verð að finna eitthvað út úr þessu. Hef árið til þess.

Bara gaman

Laugardagurinn var þvílíkt fallegur þannig að ekki kom annað til greina en að kíkja í bæinn. Við fórum fjögur saman og komum okkur snemma fyrir neðst á Laugarveginum. Þvílíkur fjöldi af fólki og alveg logn og sólin skein á okkur og við vorum að við það að kafna úr hita meðan beðið var eftir herlegheitunum. Loks eftir langa bið kom skrúðgangan hún var mjög flott og við ákváðum svo að rölta bara á eftir Páli Óskari sem var síðastur í göngunni áfram niður á Arnarhól. Þar settumst við grasið og létum fara vel um okkur og hlustuðum á tónlistina sem var reyndar ansi misjöfn og fengum okkur aðeins í gogginn. Héldum svo heim á leið glöð og kát eftir góða stund í miðbæ Reykjavíkur. Þær eru ekki margar stundirnar sem við eyðum í miðbænum en það er helst á 17.júní og svo á Gay Pride og kannski Menningarnótt og þá er það upptalið. Mér finnst miðbærinn ekki spennandi að öllu jöfnu og aldrei biðja börnin um að fara niður í miðbæ. Meira að segja eyddum við síðasta 17. júní í Kópavogi og það var alveg frábært nóg pláss fyrir alla og engin örtröð í neitt. Þar gátu foreldrar setið í grasinu og notið dagskrárinnar meðan börnin fóru á milli í leiktæki og í aðra afþreyingu. En nú er ég komin útí eitthvað sem ég ætlaði alls ekkert að pæla í í dag. Dagurinn í dag er aðeins vindasamari en gærdagurinn og ekkert ákveðið hvað gera skuli, kannski ég fari að huga að öllu hreina þvottinum sem biður um að komast í skápana. Allir þurfa víst sitt.

Og líður svo svo hratt

Nú er þessi nýbyrjaða vika að enda. Meira hvað tíminn líður. Það þarf að skoða hvað sé hægt að gera skemmtilegt þessa helgina. Það væri auðvitað gaman að fara á Fiskidaga á Dalvík en það er full mikil keyrsla fyrir eina helgi þannig að það kemur eiginlega ekki til greina. En ég mikið held ég samt að það sé gaman að upplifa svona hátíð. En það er kannski full mikið af fólki þarna og af myndum í fréttum í gær að dæma þá virtist ekki vera mikið af tjaldstæðum eftir. Þvílík mergð af fólki. Þá er að finna eitthvað í grennd við höfuðborgina kannski berjamó ef viðrar til þess nenni því ekki ef það á að rigna. Svo er Gay pride gangan á morgun alltaf gaman að fara og sjá hana. Ætli það verði ekki ofan á á laugardaginn og kannski berjamó á sunnudaginn. Annars ræðst þetta allt af veðrinu. Nenni alls ekki í pollagalla niðri í bæ þá verð ég nú frekar heima hjá mér, mér leiðist eiginlega rigning eða allavegana svona mikil rigning. Það er alveg nóg að það rigni bara á nóttinni. Mér verður kannski ekki að ósk minni með það. Nú þarf víst að finna sölutölur fyrir skýrslugerð og þvílíkan tíma sem það tekur. Kannski að dagurinn dugi ef ég fer að halda mér við efnið, mér finnst það bara svo syfjandi. Kannski ég nái mér bara í kaffibolla og komi mér að verki.

Rólegheitin...

Þá er ég komin í vinnu og það er bara nær enginn á staðnum. Miðað við hvað vinnustaðurinn er stór þá virðist Ágúst vera tíminn til sumarfría hér. Ég ætla þó að vona að liðið hafi farið til útlanda því veðrið hér er ekkert sumarveður. Það eru nú samt til einhverjir sem fíla svona veður og vita ekkert betra en rigningu að þeir segja ég held samt að það séu nú bara þeir sem fá oftast svona veður í sínum fríum og hafa bara sætt sig við það og þá er það bara allt í lagi mín vegna. Ég lenti í svaka umferðateppu á leiðinni þar sem einhverjir 3 voru svo óheppnir í morgunsárið að lenda í aftanákeyrslu það er bara versta byrjun á degi sem ég get hugsað mér. En hvað sem líður róleg heitum hér þá er samt gott að vera komin aftur í stólinn og hitta þá fáu sem þó eru hér. Nú þarf ég að koma skipulagi á mig hér og koma mér að verki. Veit þó varla hvar ég á að byrja, ætli pósthólfið sé ekki ágæt byrjun. Þar er af nógu að taka. Heyri nú aukin umgang á hæðinni sem þýðir að einhverjir eru komnir á ról og læt ég af þessu að sinni.

Sá síðasti

Þá er komið að því þetta er síðasti dagurinn minn í fríi þetta sumarið. Er ekki enn búin að ákveða hvernig ég ætla að nota hann en ætti að gera eitthvað í sambandi við allan hreina þvottinn minn. Það er víst ekki nóg að vera dugleg að þvo það þarf að ganga frá honum líka og það virðist vera einstaklega erfitt fyrir mig þessa dagana. Ég hef aftur á móti verið nokkuð dugleg að lesa í fríinu. Ég mæli með nokkrum góðum bókum eins og Flugdrekahlauparanum, Skugga vindsins, Viltu vinna milljarð, Híbýli vindanna (lét loksins verða af því að lesa hana) og nú er á náttborðinu Hringur Tankados eftir Dan Brown, hún lofar nokkuð góðu. En þó bókmenntir séu af hinu góða þá er alvara lífsins að taka við eftir fríið og byrjar með skutli eldra barnsins á æfingu í dag og þar sem æfingarnar eru ekki í hverfinu þýðir það ágæta keyrslu alla daga til skiptist með börnin ég lít þó á þetta sem góða fjárfestingu að þau séu í íþróttum sem þau hafa gaman af og í alveg ágætum félagsskap. Sumarfríið hjá þeim er víst að taka enda líka og ekki nema tvær vikur eftir fram að skólasetningu. Í heildina hefur sumarið verið gott hjá okkur þó að bæta eigi ýmislegt upp næsta sumar sem ekki var gert þetta árið. En endir á sumri þýðir líka að allt félagsstarf byrjar og ekki hefur mér enn tekist að losna úr öllum þeim stjórnum sem ég ætlaði mér, það verður verkefni vetrarins að finna mér staðgengla í það. Það fylgir því bara allt of mikil vinna að vera í fjórum stjórnum auk annarra félagsstarfa og sinna börnum og búi og 150% vinnu sem er ansi krefjandi. Það þýðir bara að eitthvað gefur eftir ef ekkert er að gert. Nú er mál að linni og ég hef sett mér þau markmið að sitja bara í tveimur stjórnum eftir þennan vetur. Nú þarf víst að drífa sig og koma liðinu í sturtu og hugsa um að koma sér út úr húsi en þó ekki fyrr enn eftir eins og einn góðan kaffibolla.

Það skellur á

Jæja helgin liðin stóráfalla laus hjá okkur. Nú fer senn að skella á vinna aftur. Dagurinn fer að komast í eðlilegt horf svo ég tala nú ekki um þegar skólinn byrjar aftur. Það er nú þægileg tilfinning að vita að allt verði aftur eins og það á að vera, ég er eins og börnin, þarf mína hversdagslegu rútínu. Þá liður mér best. Ég veit að börnunum er farið að hlakka til og hugsa um hvað þurfi að kaupa af skóladóti. Skemmtileg þessi spenna eftir skólanum á haustin, hefur bara greinilega ekkert breyst. Þá er að vona að nýi skólastjórinn haldi vel á spöðunum. Annars líst mér vel á hann, kemur alla veganna vel fyrir og heyrst hefur söknuður frá fyrri nemendum hans. Það hlýtur að boða gott, við vonum það alla veganna. Það er kannski best að koma sér á fætur og kannski eitthvað út í haust veðrið. Einhvern veginn hafa frídagarnir ekki verið notaðir sem skyldi, mest farið í leti og hangs. Nú verður maður að fara að snúa því við og undirbúa sig fyrir amstur hversdagsleikans. Tveir dagar til stefnu og þá er vinnan á ný. Það verður nóg að gera, undirbúningur fyrir haustið og veturinn, allir þurfa að fá sitt, bara skemmtilegt. Mig er farið að hlakka til.

Helgin

Helgin var fín. Við nutum þess að vera fjarri borginni og fjarri vinsælum tjaldstæðum. Einhvern veginn hefur það orðið þannig að við erum yfirleitt fjarri hámenningu Verslunarmannahelgarinnar. Börnin sjá reyndar útihátíðir í hillingum einkum vegna stemmingarinnar sem myndast í fjölmiðlum. Það sýnir þeim engan veginn raunveruleikann. Hann mun þó væntanlega koma í ljós innan fárra ára. Sennilega er það martröð allra foreldra þegar þeir hafa ekkert um málið lengur að segja. Ég mun þó reyna mitt besta til að halda þeim fjarri þessu eins lengi og hægt er. Maður bara vonar það besta. Nú er þessi helgi liðin og óneytanlega finnst manni að sumarið sé að fjara út, kannski að veðrið hjálpi þar aðeins, það er svona haustveður yfir höfuðborginni nema að það rignir ekki.